भुवन केसीको फेबरेट डेस्टिनेसन

0
8

अभिनेता भुवन केसीलाई सदाबहार अभिनेता पनि भनिन्छ । छोरा अनमोल केसी नै अभिनेताका रूपमा स्थापित भैसक्दा समेत भुवन केसीको क्रेज उत्तिकै छ । अहिले अभिनयभन्दा चलचित्र निर्माणमा बढी केन्द्रित भुवन माघ २६ गते प्रदर्शन हुने चलचित्र कृको प्रचार–प्रसारमा खटिएका छन् । यसबीच अफ्रिकाबाहेक विश्वका अधिकांश देशको भ्रमण गरिसकेका यी अभिनेताले साप्ताहिकमार्फत आफूलाई मनपर्ने घुम्ने ठाउँ अर्थात् फेबरेट डेस्टिनेसनका सम्बन्धमा बेलिबिस्तार लगाएका छन् । भुवनले आफ्ना फेवरेट डेस्टिनेसनलाई स्वदेश तथा विदेश गरी दुई भागमा वर्गीकरण गरेका छन् ।

स्वदेश

पोखरा

विश्वको जति नै सुन्दर ठाउँ पुगे पनि आफ्नै देशको पोखरा अल टाइम फेवरेट । मैले पोखराको भ्रमण कति पटक गरें भन्ने कुरा गन्नै छाडिसकें । समर होस् अथवा विन्टर, झरी होस् वा बादल, मलाई पोखरा हरेक मौसममा उत्तिकै प्यारो छ । म कसैले कहाँ घुम्न जाने भनेर सोध्यो भने पोखरा नै भन्छु ।

जोमसोम

पोखराबाट अघि बढेपछि पुग्न सकिने अर्को रमणीय स्थल हो– जोमसोम । मध्य जाडोमा जोमसोम पुग्न गाह्रो हुन्छ, यद्यपि अन्य मौसममा जोमसोम स्वर्ग नै हो । म प्राय: बिदा मनाउन जोमसोम नै पुग्छु ।

अपर मुस्ताङ

जोमसोमबाट अझै अघि बढेपछि पुगिने रमणीयस्थल हो– अपर मुस्ताङ । हिमाली श्रृंखलालाई नजिकबाट नियाल्न सकिने यो स्थलबाट देखिने ल्यान्डस्केपको बेग्लै मज्जा छ । अहिले अपर मुस्ताङ चलचित्र छायांकनस्थलका रूपमा समेत विकसित भैरहेको छ ।

धनकुटा

पूर्वी नेपालको पहाडी जिल्ला धनकुटाको सौन्दर्यले मलाई पनि लोभ्याएको छ । काठमाडौंबाट अलि टाढा पर्ने भएकाले चाहेको बेला धनकुटा पुग्न सकिँदैन, यद्यपि पूर्वी नेपालको भ्रमणका क्रममा म भेडेटार हुँदै धनकुटा नपुगी फर्किन्न । त्यहाँको प्राकृतिक सौन्दर्य, हावापानी तथा खानपान मलाई असाध्यै मनपर्छ ।

सौराहा

चितवनको सौराहा त्यसै पनि पर्यटकीय स्थलका रूपमा लोकप्रिय छ । काठमाडौंमा चिसो बढेपछि जाडो छल्नकै लागि सौराहा पुगौं–पुगौं लाग्छ । सौराहा तराईको जनजीवन नियाल्न मात्र होइन जंगल सफारीका लागि समेत प्रख्यात छ । गर्मी मौसममा समेत नारायणी किनारमा बसेर सूर्यास्तको दृश्य नियाल्न पाउँदा रमाइलो लाग्छ ।

विदेश

जुरिच

युरोपका विभिन्न देशमध्ये स्विट्जरल्यान्डको आफ्नै विशेषता छ । विश्वकै प्रमुख टुरिस्ट डेस्टिेनेसन स्विट्जरल्यान्डको जुरिच सहरको सौन्दर्य शब्दमा वर्णन गर्न सकिँदैन ।

हवाइ

अमेरिकाको सबैभन्दा नयाँ राज्य (पचासौं) हवाइ प्राकृतिक सौन्दर्यका लागि प्रख्यात छ । अमेरिकाका प्राय: सबै राज्यको भ्रमण गरे पनि मलाई हवाईको सौन्दर्यले लट्ठ बनायो । समुद्री किनार, चट्टान, घाँसे मैदानसहितको यो सहर पर्यटकीय दृष्टिकोणले समेत उत्कृष्ट छ ।

ब्रिसबेन

अष्ट्रेलियाका थुप्रै ठूला सहरमध्ये मलाई ब्रिसबेनले आकर्षित गरेको छ । प्राकृतिक सौन्दर्य, समुद्री किनार तथा हरियाली ब्रिसबेन सहरका विशेषता हुन् ।

हङकङ

एसियाली मुलुकहरूमा मलाई हङकङ सबैभन्दा प्यारो लाग्छ । हङकङको नाइट लाइफ लोभलाग्दो छ । हङकङ पुगेपछि दिन बितेको समेत पत्तो पाइँदैन ।

LEAVE A REPLY

Please enter your comment!
Please enter your name here